When Is School Closed Due to Weather?

Lub Kaum Ob Hlis, 2007

Nyob Zoo Txog Cov Yim Neeg Ntawm MMSD Cov Me Nyuam Kawm Ntawv,

Thaum muaj huab cua phem, Nroog Madison Cheeb Tsam Tsev Kawm Ntawv yuav ua raws cov txheej txheem los txiav txim siab seb puas yuav qhib los yog kaw cov tsev kawm ntawv. Vim yog lub caij ntuj no los txog lawm, kuv xav rov muab cov txheej txheem no los qhia rau nej.

Tsoom fwv tsev kawm ntawv yuav tsum muab kom tau ib qho kev txiav txim siab uas zoo dua ntais rau 25,000 tus me nyuam kawm ntawv. Qhov kev txiav txim siab no kuj yuav tsis haum rau nej txhua tus qhov. Yog li ntawd, peb thiaj li txhob thiab txhawb kom nej muab qhov kev txiav txim siab uas yuav zoo dua ntais rau nej tus me nyuam. Nej yog tus txiav txim tau zoo tshaj rau nej tus me nyuam qhov kev noj qab nyob zoo thiab kev ruaj ntseg txhua lub caij.

Tus Txheej Txheem Muab Kev Txiav Txim Siab Seb Cov Tsev Kawm Ntawv Yuav Raug Qhib los yog Raug Kaw Thaum Los Daus thiab/los yog los Nag Khov (Snow/Ice)

Tsoom fwv tsev kawm ntawv yuav pib xyuas cov huab cua puag thaum ntxov ntxov nyob rau yav sawv ntxov ntawd. Lawv yuav tham nrog cov neeg tshaj tawm txog huab cua, Feem Saib Xyuas Cov Kev hauv Nroog, Nroog Madison Feem Tub Ceev Xwm thiab Dane County Feem Tub Ceev Xwm, thiab tsoom fwv tsev kawm ntawv cov neeg ua hauj lwm seb txhua lub tsev kawm ntawv puas siv tau rau cov me nyuam thiab cov neeg ua hauj lwm.

Peb kuj yuav tham nrog cov bus companies seb cov buses puas yuav muaj cuab kav khiav tau kom muaj kev ruaj ntseg zoo mus los rau tom tsev kawm ntawv. Qhov no yog qhov txheej xwm tseem ceeb nyob rau peb qhov kev txiav txim siab. Peb yuav muab kev txiav txim siab seb yuav kaw cov tsev kawm ntawv rau thaum 6:30 a.m. los sis ntxov dua ntawd, thiab qhia qhov kev txiav siab no mus rau txhua qhov chaw tshaj xov xwm tawm nyob hauv zos.

Qhov Nej Yuav Paub Tau Seb Cov Tsev Kawm Ntawv Puas Raug Kaw

Nyob rau yav nruab hnub thaum muaj huab cua phem, mloog cov xov tooj cua los yog saib cov tshooj TV hais txog kaw tsev kawm ntawv. Nej kuj yuav mus xyuas peb qhov web site ( http://www.mmsd.org) los yog saib MMSD-TV (Cable Tshooj 10 los yog 19) tau tib yam.

Thaum Cov Tsev Kawm Ntawv Raug Kaw Vim Yog No Heev

Peb tsab cai mas yuav tau kaw Nroog Madison cov tsev kawm ntawv yog Tsoom Fwv Saib Xyuas Huab Cua tshaj tawm ceeb toom tias yuav muaj cua ntsawj txias txog 50 degrees qis dua zero rov hauv tas nrho ib hnub ntawd. Yog tshaj tawm tias cov huab cua yuav khees zuj zus rau yav nruab hnub ntawd, peb yuav tsis kaw cov tsev kawm ntawv.

Thaum Cov Tsev Kawm Ntawv Raug Kaw, Cov Kev Kawm Txhua Yam Yuav Raug Muab Tso Tseg

Thaum Madison cov tsev kawm ntawv raug kaw rau hnub ntawd, nws txhais tau tias cov kev kawm txhua yam tau teem tseg rau hauv lub tsev kawm ntawv rau hnub ntawd yuav raug muab tso tseg. Qhov no xws li MSCR cov kev kawm txhua yam thiab cov kev kawm tom qab kev kawm xaus txhua yam.

Vim Li Cas Cov Tsev Kawm Ntawv Ho Tsis Tso Los Tsev Ntxov Nyob Rau Tej Hnub Muaj Huab Cua Phem

Muaj ntau yim neeg, cov laus mus ua hauj lwm rau sab nrauv thiab tsis tau npaj muaj neeg zov me nyuam ua ntej qhov tsev kawm ntawv xaus rau hnub ntawd. Tsis tas li ntawd, yog nej muaj sij hawm thiab yog nej xav tias nej cov me nyuam yuav muaj kev ruaj ntseg dua yog nyob tom tsev, nej muaj cuab kav tuaj tos nej cov me nyuam ua ntej tsev kawm ntawv xaus rau hnub ntawd los tau. Yog nej tuaj tos, mus rau tom tsev kawm ntawv chav tuav dej num thiab hais rau lawv kom tso nej cov me nyuam nrog nej mus tsev.

Peb Yuav Ua Tiag Ceev Cov Tsev Kawm Ntawv Qhib

Thaum cov tsev kawm ntawv kaw, ntau yim neeg muaj teeb meem txog kev zov me nyuam. Yog li ntawd, peb yuav ua tiag ceev cov tsev kawm ntawv qhib yog nws muaj kev ruaj ntseg ua tau li ntawd. Tsis tas li ntawd, raws li peb tau teev rau saum no, cov niam txiv muaj cuab kav txiav txim siab los ceev lawv cov me nyuam nyob tom tsev thaum muaj huab cua phem.

Vim Li Cas Ho Tsis Muab Lub Caij Tsev Kawm Ntawv Pib Ncua Thaum Muaj Huab Cuab Phem uas yog Yuav Khees Zuj Zus Rau Yav Nruab Hnub

Muaj ntau yim neeg, cov laus mus ua hauj lwm rau sab nrauv tsis muaj cuab kav yuav hloov tau lawv lub sij hawm ua hauj lwm los yog nrhiav tau neeg zov me nyuam kom haum rau lub caij pib lig ntawd. Yog nej tsev neeg thauj nej cov me nyuam tuaj rau tom tsev kawm ntawv, peb yeej txaus siab qhov kev kub siab nyob rau tej hnub muaj huab cua phem ntawd thiab paub hais tias cov me nyuam yuav tuaj txog lig zog.

Thaum Cov Tsev Kawm Ntawv Raug Kaw Rau Lwm Yam Txheej Xwm

Yog nej muaj lus nug txog cov tsev kawm ntawv los yog tej lub tsev kawm ntawv seb puas yuav raug kaw rau lwm yam txheej xwm uas tsis yog muaj huab cua phem, thov mloog cov xov tooj cua los yog cov tshooj TV hauv zos, mus xyuas peb qhov web site los yog saib MMSD-TV.

Ua Tsaug Rau Nej Qhov Kev Nkag Siab thiab Kev Koom Tes

Txhua yim neeg mas muaj tej yim neeg zoo siab qhov tsev kawm ntawv qhib kawm rau tej hnub muaj huab cua phem, tab sis kuj muaj tej yim neeg xav tias cov tsev kawm ntawv yuav tsum raug kaw. Ua hauj lwm tau 40 tawm xyoo nyob hauv fab kev kawm, kuv pom tias qhov kev txiav txim siab qhib los yog kaw cov tsev kawm ntawv thaum muaj huab cua phem yeej muaj tej yam kev tsis haum siab nyob hauv zej zog — tsis hais peb yuav mus rau txoj kev twg li.

Peb txaus siab rau nej qhov kev nkag siab ntawm tej kev cov nyom nyob rau kev txiav txim siab no, thiab nej qhov kev txhawb nqa los pab nej cov me nyuam kom tuaj txog tom tsev kawm ntawv muaj kev ruaj ntseg zoo nyob rau lub caij ntuj no.

Lus Meej Tseeb,
[Signed]
Art Rainwater
Tuam Thawj Tuav Tsev Kawm Ntawv

Wind Chill Information